ఒక రోజు కొందరు గ్రామస్తులు రచ్చబండ వద్ద కూర్చుని కబుర్లు చెప్పుకుంటున్నారు. ఉన్నట్టుండి బాలన్న అనే యువకుడికి తుమ్ములు మొదలైతే, "ఈ మధ్య నాకు జలుబు చేస్తే గుంటగలగరాకు మాత్రలు వేసుకుంటే వెంటనే మటు మాయమైంది. మా ఇంటికి వెళ్లి మాత్రలడిగి తీసుకో", అన్నాడు కామేశం. బాలన్న సరేనని తుమ్ము కుంటూ అక్కడినుంచి వెళ్ళిపోయాడు.
"బాలన్న ఓపట్టాన ఎవరి మాటా వినడు. వాన్ని బలే ఒప్పించావే!"అంటూ ఓ పెద్ద మనిషి కామేశాన్ని మెచ్చుకున్నాడు.
దాంతో కామేశం రెచ్చిపోయి, "నాకీ బాలన్న ఓ లెక్కా? తాను పట్టిన కుందేటికి మూడే కాళ్లనే వాడిని కూడా నేను నా మాటలతో ఒప్పించగలను,"అంటూ దంబాలు పలికాడు.
అప్పుడే పక్కనే ఉన్న రామేశం కలగజేసుకుని, "ఎవరి సంగతో ఎందుకు? కంటికి కనిపిస్తే చాలు - నిజమని ఒప్పుకునే నాలాంటి వారిని కూడా నేను ఇష్టపడి తేనే ఒప్పించగలవు. ఉదాహరణకు నా వెనక ఉన్న రావిచెట్టును వేపచెట్టని ఇప్పటికిప్పుడు నా చేత ఒప్పించి చూద్దాం,"అన్నాడు రామేశం.
రామేశం వెనుక ఉన్నది నిజంగానే వేపచెట్టు కావడంవల్ల, నీ వెనుక నున్నది వేపచెట్టు అయితే రావిచెట్టు అంటావేమిటి? అంటూ చిరాకుపడి అటు వెళ్లి, దాని ఆకులు కోసి తెచ్చి చూపాడు కామేశం. "ఇవి వేపాకులే. కానీ ఆ ఆకులు నా వెనుక చెట్టువేనని ఎలా నమ్మడం?"అన్నాడు రామేశం. అప్పుడు కామేశం అక్కడున్న ఊరి పెద్దలను సాక్ష్యం చెప్పమన్నాడు. రామేశం ఒప్పుకోక, ఒప్పించాల్సింది నువ్వైతే , వాళ్ల చేత ఒప్పిస్తావేమిటి? ఐనా, చూసి తెలుసుకునేందుకు నా కళ్ళు నాకుండగా, ఇతరుల మాటలు వినాల్సిన అవసరం నాకేమిటి?"అన్నాడు.
"ఐతే వెనక్కి తిరిగి చూడు. నీ కళ్ళు బావుంటే అది వేపచెట్టని నీకే తెలుస్తుంది,"అన్నాడు కామేశం ఉక్రోషంగా.
ఇప్పుడు నాకు వెనక్కు తిరగాలనిలేదు. కావాలంటే ఆ చెట్టును తెచ్చి నా ముందుంచు. లేదా నన్ను ఒప్పించలేకపోయానని ఒప్పుకో", అన్నాడు రామేశం. అంతా నవ్వారు. రామేశం చేతిలో కామేశం భంగపడ్డాడు.
పిల్లలు మరియు పెద్దలకు ఉపయోగపడే నీతి కథలు
7tvnews.in
Post a Comment